Alamat ng Tinagong Dagat - Page 4 of 9
ni Sol Doronila Penuela
(Ang Interpretasyon)
(Liliwanag ang entablado. Lilingon si Nagong kay Agat.)
Agat: Salamat at ako'y ipinagtanggol mo.//
(Magtitinginan sila. Magpapahiwatig na sa unang pagkikita, pareho silang humahanga sa isa't isa.)
Nagong: Walang anuman binibini./
(Magalang. Matindi ang ekspresyon ng paghanga.)
Koro: Sa kanyang paghakbang/ si Nagong napahinto//
Sa gandang namalas/ dibdib ay sumikdo//
Habol ang hiningang halos ay mapugto//
Sa namalas na ganda'y/ nabihag ang puso//
(Iaayon ng koro ang ekspresyon sa mga linyang binibigkas. Klaro at magaan ang pagbigkas ng mga salita.)
Soloista 5: Malabathalang dilag ang nakita niya//
Aga tang pangalan/ o anong ganda!///
Kaytamis bigkasin na bagay sa isang nimpa/
Akala ni Nagong nangangarap lamang siya./
(Pokus kina Nagong at Agat ang spotlight. Ipakikita nila ang ekspresyon ng pag-ibig.)
Koro: Akala ni Nagong nangangarap lamang siya//
(Banaag sa mukha ang ekspresyon ng pag-ibig.)
Koro: At doon nagsimula ang pag-iibigan//
Ng dalawang pusong tapat na nagmamahalan///
Ligaya ay halos walang pagsidlan//
Damdaming kaytamis// kaytamis//
Kaytamis// sa puso'y sinisimpan//
(Magkahawak-kamay na mamamasyal sa entablado ang magkasintahan. Maghahabulan. Ang koro ang gagawing kublihan. May hahalakhak na puno ng pag-ibig. Tunog ng mabining hangin, awit ng ibon. Matinding ekspresyon ng pag-ibig ang ipaaabot sa madla.)
Koro: Ahhh// ngunit isang hapon sila'y nagulantang//
Ama ni Agat/ buong karahasang pinakialaman ang magkasintahan//
Damdaming nasa puso'y hindi pinagbigyan///
(Iaayon ang ekspresyon sa mga linyang bibigkasin. Lalabas sa entablado ang makapangyarihang Ama. Marahas. Malupit.)
Ama: (madiin) Agat!// Agat!// Lapastangan anak!// bakit ang bilin ko'y iyong sinuway?//
Bakit, bakit ka nakikipag-usap sa isang kaaway?//
Ako ba'y…//
(Galit. Makapangyarihan. Parang sumasabog na bulkan sa galit.)
Agat: Ngunit ama ko!//
(Iiyak. Magmamakaawa. Lalapit sa ama ngunit sasalubungin siya ng sampal. Lalayo nang ilang hakbang sa mag-ama si Nagong. Magpapakitang kontolado ang emosyon. Nais niyang tulungan si Agat subalit wala siyang magawa. Bagong pormasyon ang lilikhain ng koro.)
Agat: Ngunit ama/ sa pag-ibig ako ba'y wala nang kaligayahan?//
Si Nagong at ako'y tapat na nagmamahalan//
Nakikiusap ako ama ko// kami'y inyong pagbigyan///
(Nagmamakaawa. Hahawakan ang kamay ng ama. Galit ang ama, nakatingin sa manonood, nagtitiim-bagang at nakatikom ang kamao. Makikita sa mukha ang poot [Eksaherado ang ekspresyon kung maluwang ang entablado])
Ama: Haaah!